1. სპორტმშენში (შემდგომში - „კონკურსი“) მონაწილეობა შეუძლია საქართველოს მოქალაქეს ან საქართველოში კანონიერად მყოფ ფიზიკურ პირს რომელსაც კანონმდებლობით დადგენილი წესით აქვს მინიჭებული ბინადრობის უფლება საქართველოს ტერიტორიაზე (შემდგომში - „მონაწილე“).
2. ყველა მონაწილე უნდა იყოს სრულწლოვანი და აკმაყოფილებდეს კანონით დადგენილ მინიმალურ ასაკობრივ ზღვარს - 18+.
3. კონკურსის ორგანიზატორია „აჭარაბეთი“ (შპს „ავიატორ“, ს/კ: 405076304).
4. განაცხადების მიღების დასრულებიდან 1 კვირის ვადაში, აჭარაბეთი დაუკავშირდება მხოლოდ იმ მონაწილეებს, რომლებიც ჟიურის გადაწყვეტილებით გადავლენ მეორე, ინტერვიუს ტურში.
5. ინტერვიუს ტურში მონაწილეებმა უნდა გააკეთონ პრეზენტაცია (ონლაინ ან ოფლაინ), რომელიც ლაივ რეჟიმში გადაიცემა კონკურსის ვებგვერდსა და ფეისბუქ გვერდზე) და ჟიურის უფრო დეტალურად მოუყვნენ თავისი გამოგონილი სპორტის შესახებ.
6. მეორე ტურის პასუხები და 3 გამარჯვებულის ვინაობა ცნობილი გახდება ინტერვიუს ტურის დასრულებიდან 10 დღეში.
7. კონკურსის მონაწილე ადასტურებს, რომ პირველ სამეულში მოხვედრის შემთხვევაში აუცილებლად მიიღებს მონაწილეობას აჭარაბეთის მარკეტინგულ აქტივობებში აჭარაბეთის მოთხოვნის შესაბამისად, ხოლო ინტერვიუში (მეორე ტურში) მონაწილეობით მონაწილე ადასტურებს, რომ აჭარაბეთს ეძლევა უფლება გამოიყენოს პრეზენტაციისა და ინტერვიუს ნაწილი საკუთარი შეხედულებისამებრ, მათ შორის მოახდინოს მონაწილის ხმის და მისი გამოსახულების ჩაწერა და ნებისმიერ მასალაში ჩართვა, ასევე აუდიო-ვიზუალურ ნაწარმოებში მისი სინქრონიზაცია და გამოყენება.
8. კონკურსის ფარგლებში მონაწილეების მიერ წარდგენილ (მათ შორის, პრეზენტაციით, ტექსტური და ვიდეო/ფოტო მასალით მიწოდებულ) ინტელექტუალური შემოქმედების შედეგზე (შემდგომში - „პროექტი“) განსაკუთრებული საავტორო უფლებები გადაეცემა აჭარაბეთს. შესაბამისად, აჭარაბეთი უფლებამოსილია საკუთარი შეხედულებისამებრ და გამარჯვებული მონაწილე(ებ)ისათვის დამატებითი საზღაურის გადახდის გარეშე გამოიყენოს პროექტი, მათ შორის, განახორციელოს მონაწილის მიერ გამოგონილი სპორტის სახეობის ეკრანიზაცია.
9. მსოფლიოში არსებული ეპიდემიოლოგიური ვითარებიდან გამომდინარე, აჭარაბეთი იტოვებს უფლებას საკუთარი შეხედულებისამებრ გადაწყვიტოს გამარჯვებულ იდეაზე ჩემპიონატის ჩატარება.
10. საპრიზო თანხა გადაეცემა გამარჯვებულ მონაწილეს, რომელმაც ვებგვერდზე განაცხადი ატვირთა. მონაწილე თავად არის პასუხისმგებელი გუნდის (ასეთის არსებობის შემთხვევაში) წევრებისათვის საპრიზო თანხის გადაცემაზე. აჭარაბეთი თავისუფლდება ნებისმიერი სახის მოთხოვნისა და პასუხისმგებლობისგან, რომელიც დაკავშირებულია გუნდის წევრებს შორის საპრიზო თანხის განაწილებასთან.
11. გამარჯვებულების გამოვლენას განახორციელებს ჟიური საკუთარი შეხედულებისამებრ. შეფასების კრიტერიუმები მრავალფეროვანია, თუმცა პროექტი უნდა იყოს: ინოვაციური და ორიგინალური, ადვილად განხორციელებადი, ტექნიკურად გამართული და ყველა დეტალის შემცველი.
12. ჟიურის მიერ მიღებული გადაწყვეტილება საბოლოოა და არ ექვემდებარება გასაჩივრებას.
13. მონაწილის განაცხადი და თანდართული მასალები არ უნდა არღვევდეს საქართველოს კანონმდებლობას, წინამდებარე წესებსა და პირობებსა და მესამე პირების უფლებებს. ასევე, მონაწილის მიერ მოფიქრებული ახალი სპორტის სახეობა არ უნდა შეიცავდეს სპორტში აკრძალულ ხერხებს, ადამიანის უფლებების შემლახველ ან კანონმდებლობით აკრძალულ სხვა ქმედებებს. წინააღმდეგ შემთხვევაში, მონაწილე დისკვალიფიცირებული იქნება კონკურსიდან.
14. მონაწილე ადასტურებს, რომ მოპოვებული აქვს ყველა საჭირო თანხმობა და ნებართვა, რაც შეიძლება უკავშირდებოდეს კონკურსში განაცხადის და თანდართული მასალების გამოგზავნასა და მონაწილეობას.
15. განაცხადის შევსებით მონაწილე ეთანხმება, რომ მის მიერ განაცხადში მითითებული (მათ შორის, მესამე პირისგან მიღებული) პერსონალური მონაცემები ორგანიზატორის მხრიდან დამუშავდეს მოქმედი კანონმდებლობის დაცვით, კონკურსის ჩატარების, მათ შორის, წინამდებარე წესებსა და პირობებში მითითებული მიზნებისათვის. მონაწილე აცხადებს თანხმობას, რომ განაცხადი გადაეგზავნოს ჟიურის წევრებს და ასევე უფლებას აძლევს ორგანიზატორს დაეკონტაქტოს მას განაცხადში მითითებულ საკონტაქტო მონაცემებზე.
გაუზიარე მეგობარს
